8 fevral - Abşeron Milli Parkının yaranması günü

Abşeron Milli Parkı Azərbaycan Respublikası Prezidentinin 2005-ci il 8 fevral tarixli Sərəncamı ilə Bakı şəhərinin inzibati ərazisində, Abşeron Dövlət Təbiət Yasaqlığının bazasında yaradılmışdır. Yarımsəhra və quru bozqırların mülayim isti iqlim tipinin hakim olduğu Milli Parkın yaradılmasında məqsəd vəhşi təbiətin mühafizəsini, nəsli kəsilməkdə olan nadir flora və fauna növlərinin qorunub saxlanmasını təmin etmək, o cümlədən ekoturizm üçün mövcud olan təbii imkanları dəyərləndirməkdən ibarətdir.

Rast gəlinən bitki növləri: Budaqlı yulğun, Hind bağayarpağı, iti cığ, yabanı kök, adi yovşan, süpürgəvari dəvəayağı, xirdaçiçəkli tayaotu, ikisünbül acılıq, fars sarmaşığı, adi qamış, Bakı gəvəni və s.

Rast gəlinən heyvan növləri: ceyran, canavar, tülkü, dovşan, adi kirpi, çöl donuzu, çaqqal, Aralıqdənizi tısbağası, Xəzər tısbağası, adi suilanı, gürzə, Xəzər gekkonu, qum siçanı, Ərəb dovşanı, Qaqaz kələzi, qırmızıboyun batağan, iri batağan, qıvrımlələk qutan, iri qarabatdaq, böyük ağ vağ, boz vağ, qızılqaz, harayçı qu quşu, yaşılbaş ördək, fitçi cürə, enlidimdik ördək

”Qırmızı kitab”a daxil olan növləri: Xəzər suitisi, ceyran, adi soltanquş, ağgöz qaraördək, fısıldayan qulələk, adi flaminqo, kürən vağ, qıvrımlələk qutan və s.