Böyük  Qafqaz  silsiləsinin cənub yamaclarında  və Acınohur geoloji  əyalətində  geoloji  axtarış və  kəşfiyyat işləri  aparır. 2007-ci ildə Vəndam struktur fomasiya zonasının Bucaq kəsimində əlvan və nadir metallara (nikel, mis, kobalt və s.) axtarış işləri başa çatdırılmış, diqqətəlayiq proqnoz resursları hesablanmışdır. Acınohur geoloji əyalətinin Əlicançay qonur kömür təzahürü sahəsində uğurlu nəticələr əldə edilmişdir.

Böyük Qafqazda əlvan metallurgiya bazasının əsasını təşkil edə biləcək Balakən filiz rayonu aşkarlanmışdır. Filizçay, Katsdağ, Katex, Saqator kolçedan-polimetal yataqlarının sənaye ehtiyatları davamlı istismar qabiliyyətinə malik nəhəng dağ-mədən kompleksinin yaradılmasına imkan verir. Son illər Duruca, Vəndam,  Meçex-Çadaor  zonalarında geoloji axtarış işləri  aparılır.  Duruca zonasında qara  şistlərdə   qızıl-sulfid filizləşməsinə  aid  olan   Damarcıq, Çuxadurmaz,  Qızılqaya , Filfilli, Həmzəlli, Xalxal, Qalacıq, Dabalt təzahürləri  aşkarlanmışdır. Böyük  Qafqaz qırışıqlıq qurğusunun cənub qanadında  ultraəsası və əsasi tərkibli intruziv kompleksin, onlarla bağlı kobalt və nikel  minerallaşmalarının aşkarlanması ilə bu  regionun  faydalı qazıntı yataqlarına  perspektivliyi xeyli  artmışdır.

Meçex-Çadaor zonasında Yatıqçay kəsimində  region üçün  daha bir əhəmiyyətli istiqamət - molibden, qalay toplantılarına axtarış işləri müəyyənləşdirilmişdir.

Acınohur geoloji  əyalətində  ilk dəfə  təşkil olunan geoloji axtarış işləri  bu ərazidə geniş yayılmış  konqlomeratlarda  qızıl  nişanələri, titanmaqnetit mineralları,  müxtəlif təyinatlı  gil yataqları,  vulkan külləri yayıldığını, istilik-enerji xammalı (qonur kömür) təzahürlərinin olduğunu göstərir; həmçinin  tikinti materialları  yataqları (qum, qum-çınqıl qarışığı, əhəng daşı), habelə  üzlük və bəzək daşları  (Qəbələ, Oğuz rayonlarında) mövcuddur.

Bu  regionun  ümumən  Respublikada  yaradılacaq dağ-mədən sənaye kompleksində  mühüm rol oynaya biləcəyini nəzərə alaraq,  etibarlı təbiətdən istifadə və təbiəti  mühafizə  sisteminin yaradılması məqsədi ilə geoekoloji  tədqiqatlar icra olunur,  optimal texnoloji və  istismar sxemləri hazırlanması üçün ciddi araşdırmalar aparılır.

 Ekspedisiya fəaliyyət sahəsinin  faydalı qazıntılara nəzərən yenidən qiymətləndirilməsi üçün  fəal iş aparır.